ANDACHARIUS seu HADWACKER vel ODOACER

ANDACHARIUS, seu HADWACKER, vel ODOACER

unus ex filiis Hengisti, (qui A. C. 449. Britanniam occupatam de gentis suae nomine, Angliam vocavit) in Germania, stemma produxisse fertur, per illos posteros, Hadvigatum, Hildericum, Bodicum, Bertholdum, Sighardum vel Sigismundum, Saxonum Duces vel Reges. Huic Sighardo Henetorum A. C. 633. victori, filium dant Dietericum Regem a Carolo Martello A. C. 722, victum et dein Carolomanno rebellem. Dieterico assignantur Edelhardus, Bertholdus, Wernekinus, bellis adversus Carolomannum et Pipinum Francos celebres: quae bella continuavêre adversus Carolum M. Albion et Hermannus Edelhardi, ac Witikindus hodiernorum Saxoniae Principum conditor, Wernekini filius. Vide Phil. Iacobum Spenerum Sylloge Geneal. Hist. in fam. Witikindena Saxenica: et infra in voce Witikindus.